Projekty

Na projekty wusměrjonu wucbu realizěrujomy na našom gymnaziumje we wšyknych wucbnych pśedmjatach. Wuknjece źěłaju w takem wuknjeńskem procesu na tom, což sebje póstajiju a mimo togo samostatnje. Pśi tom nastawaju kreatiwne źěłowe wuslědki, kenž mógu se w šuli prezentěrowaś.

Tak pśeměnjaju se na pśikład šulske koridory pšawidłownje do wustajeńskich galerijow. Na sćěnach wise pón nejnowše kreslanki, kolaže abo instalacije, kenž su nastali we pśedmjaśe wuměłstwo.

W pśedmjaśe Pśedstajuce graśe wuwijaju wuknjece w dwěma šulskima lětoma abiturnego schójźeńka źiwadłowe graśe abo montažu ze samo wumyslonych tekstow, a to za pśedstajenje na jawišću zdrjały. Wuslědk togo kreatiwnego wuměłskego procesa jo pótom pó tradiciji pśedstajenje w źiwadle “Piccolo” w Chóśebuzu.

Mimo togo wótměwaju se teke projektowe dny k wěstym tematiskim śěžyšćam, a to pśecej w tyźenju do gódownych proznin. Pón se pśeměnja ceły gymnazium do kreatiwneje wuknjeńskeje źěłaŕnje.

Nazgónjenja z Corona pandemije su k tomu wjadli, až se projektowe źěło na Dolnoserbskem gymnaziumje w pśichoźe hyšći wěcej na temje digitalizacije orientěrujo. To pótrjefijo wósebnje wuše lětniki. Wóni dawaju swóju wědu wó wobchadanju z digitalnymi źěłowymi rědami na młodšych wuknjecych dalej. Wóni je rozpokazuju, sami projekty ako Kahoot, wideo-filmiki, wuknjeńske programy (App) wobźěłaś a wugótowaś, bźez togo až zabydnu glědaś na stwóriśelske pšawa a šćit datow. Tak nastawa wósebna atmosfera socialneje zgromadnosći a wšykne wót togo profitěruju.